كرس اسبوعي لتجديد حيوية وجمال بشرتك وشعرك من خبيرة التجميل رانيا
ماسك الرز لتفتيح البشرة
المقادير:
ملعقة كبيرة رز بلدي مطحون
ملعقة كبيرة ترمس مطحون
½ ملعقة صغيرة كربوناتو
الطريقة:
اخلطي المقادير دي كلها مع بعض، وشيليها عندك في برطمان زجاجي، ولما تيجي تستخدميه اعجنيه بمقدار مناسب من المية السخنة، وهتحسّي إن فيه فوران خفيف لما تضيفي الميه عليه بسبب الكربوناتو، اللي بيعتبر من الحاجات المفيدة جدا لتفتيح البشرة، وكمان بيشيل الحبوب الصغيرة، وبيزيل الدهون عن بشرة الوش والجسم، وبيطرّي البشرة جدا.
بس خلّي بالك لو بشرتك جافة شوية ممكن تستبدلي الترمس بالحمص مطحون.
بعد ما تضيفي الميه وتبقى العجينة ليّنة، افرديها على بشرتك وسيبيه لمدة من 15 : 20 دقيقة بس.
الماسك ده بيساعد في تفتيح بشرة الوش والجسم، لكن ما ينفعش إننا نستخدمه فوق وتحت العين، وممكن نعمله مرة كل أسبوع أو أسبوعين.
ماسك الطمي لنضارة ولمعان البشرة
المقادير:
ملعقة صغيرة طمي مغربي مدوّب في ميه سخنة
½ ملعقة صغيرة زيت بندق
¼ ملعقة صغيرة زيت ورد
ملعقة صغيرة عصير برتقال
ملعقة كبيرة زبادي
الطريقة:
دوّبي الطمي وزيت البندق وزيت الورد والزبادي مع بعض، وفي الآخر ضيفي عليهم عصير البرتقال؛ لأنه بيدّي نضارة ولمعان للبشرة، وبيساعدها على أن تكون أكثر شبابا، والماسك ده ممكن نستخدمه لبشرة الوش والجسم وكمان للأماكن الحساسة.
